El Shanghai World Financial Center (SWFC; en llingua china 上海环球金融中心) ye un rascacielos asitiáu nel distritu de Pudong de la ciudá china de Shanghai. Foi diseñáu por Kohn Pederson Fox y llevantáu pola constructora xaponesa Mori Building Company. Ye un rascacielu d'usu mixtu, qu'abelluga oficines, hoteles, sales de conferencies y miradores, amás de centros comerciales na so planta baxa. L'hotel, nomáu Park Hyatt Shanghai, ocupa los pisos que hai ente'l 79 y el 93. Ye, coles sos 174 habitaciones y suites, el segundu hotel más altu del mundu.
El rascacielos, acabáu el 14 de setiembre de 2007, tien 492,0 m d'altor. Foi, de la que lu acabaron, el segundu edificiu más altu del mundu y el más altu de los de la China continental. Abriose oficialmente'l 28 d'agostu de 2008, y tien un mirador, el más altu del mundu de la que se abriera, a 474 m del nivel del suelu. El so diseñu foi mui emponderáu, y ganó'l premiu al meyor rascacielos acabáu nel 2008[1]. Pesie al so impresionante altor,ta previsto que seya superáu pola vecina Shanghai Tower, que ha acabase de construyir nel 2014. Esta, xunto col SWFC y el tamién vecín Jin Mao Tower, van formar el primer conxuntu mundial de trés rascacielos que superen los 400 m d'altor.
© MMXXIII Rich X Search. We shall prevail. All rights reserved. Rich X Search